Мен бул макаламды кыргыздын ХХ кылымдагы чыгаан жазуучусу, КРнын Баатыры Түгөлбай Сыдыкбеков атабыздын “Бабалар өтөгөн бардык жакшы иштер аталарга, аталардын өтөгөн жакшы иштери балдарга сабак… Ошол жакшы иштерди таануу – колдогу шам чыракты өчүрүп, алга карай басуу менен барабар” деп айткан сөзү менен баштоону эп көрдүм.
Жакшылык – адамдардын ак дилиндеги бакубаттыгы, бийик умтулуулары, ак ниеттүү каалоолору жана келечекке карай ак пейилден күткөн үмүттөрү. Жаманчылык – моралдык талаптарга түздөн-түз каршы келген, коомдогу жат көрүнүштөр, жүрүм-турумдар, жорук-жосундардын жыйынтыгы. Социалдык түрүндө коомдогу терс көрүнүштөрдүн кеңири тобун камтыган, коомдун таламдарына, жашоонун бакыбаттуу жүрүшүнө кедерги болгон, тымызын же кыйыр түрдө каршы туруп, жалпы прогресске тоскоолдук түзгөн субъективдүү көрүнүштөрдүн топтому.
“Жакшы сөз жан эргитет, жаман сөз жан кейитет” демекчи, жакшы сөз, жакшы маалымат адам баласынын аң-сезимине оң таасир этип, дем-күч берээри анык.
Кыргызстандын, элдин жүгүн, жоопкерчилигин артынган Мамлекет башчыбыз Жапаров
Садыр Нургожоевич өлкөнүн өнүгүүсүнө, элдин жашоо турмушунун жакшырышына жан үрөп, ар дайым “Биз азыр пайдасын көрүп жаткан кен-байлыктарыбыз чексиз эмес, убактылуу. Баары түгөнөт. Биздин түбөлүктүү келечегибиз туризм жана өндүрүш менен. Туризм – түбөлүктүү байлык. Өлкөнүн өнүгүү стратегиясында туризм артыкчылыктуу тармак катары көрсөтүлгөн. Бул багытта мамлекеттик деңгээлде ири долбоорлор ишке ашырылып, инфраструктура жакшыртылууда. Туризм – Кыргызстандын стратегиялык келечеги” деп белгилейт. Мындан улам, ар бир жаран, ар бир медиа жана жарандык коомдун өкүлдөрү учурдагы туристтик мезгилде өлкөбүздүн жакшысын гана ашырсак, өлкөбүздүн өсүп-өнүгүүсүнө, жаш мамлекетибиздин буттан турушуна багыт алып, жакшылыктардын гана жарчысы болсок дейсиң. Себеби, маалыматтарды коомго таратууда медиа өкүлдөрүнүн ролу чоң. Алар кандай маалыматтарды таратпасын, коом аны өзүнө сиңире берет. Кыргыз эли “Жаманды жашыр, жакшыны ашыр”, “Жакшынын шарапаты, жамандын кесепети”, “Жакшылыктан үмүт үзбө”, “Башталган иштин аягы жакшы”, “Жакшысын эч ким бербейт”, “Жакшы эли менен” деген жана башка ушул сыяктуу мааниси терең кептерди бекеринен айткан эмес. Элибиздин салттуу баалуулуктарында деле терс кабарлар менен бөлүшүү жакшы көрүнүш катары саналбайт. Мындан улам, Президенттин Администрациясынын маалыматтык саясат кызматынын жетекчиси Дайырбек Орунбеков өзүнүн социалдык тармактагы баракчасына жалпы коомчулук колдой турган төмөнкүдөй билдирүү жазды:
— Урматтуу ММК өкүлдөрү, блогерлер жана журналисттер!
Силер да ар бириңер мекенди сүйгөн, Кыргызстандын патриот атуулусуңар. Өлкөбүз өнүксө деген тилек, кыял баарыбызда бар. Ал үчүн мамлекетибиздин аброю жакшы болушу абзел. Биздин өнүгүүнүн бирден-бир маанилүү булагы — туризм. Азыр туристтик сезон кызып турган учур. Дал ушул маалда болуп жаткан кырсыктарды, зордук-зомбулукту чагылдырбай, бир аз карманып турууну суранам.
Башка өлкөлөрдө да кырсыктар, атышуулар, адам өлтүрүүлөр сыяктуу окуялар болот. Бирок алардын жарандары, журналисттери жана блогерлери мындай окуяларды чагылдырууда өлкөсүнүн аброюна шек келтирбөө үчүн жоопкерчиликтүү мамиле кылышат. Анткени башка өлкөгө эс алууга барган туристтер социалдык тармактардагы жана интернеттеги маалыматтарды окуп, изилдешет.
Акыркы мезгилде жол кырсыктары, андагы оор көрүнүштөр, кандуу кадрлар, адамдын жанчылган денеси тартылган сүрөт-видеолор коомчулукка жарыяланып жатканын көрүп жатам. Мындай материалдарды таратуу менен эч кандай пайда таппайсыңар. Тескерисинче, адамдын аң-сезимине терс таасир тийип, коомдо агрессия, чоочулоо жаралат.
Ошондуктан, урматтуу мекендештер! Өнүгүүнүн бирден-бир булагы болгон туризм тармагына зыян тийгизбейли. Анын ордуна туристтик жайларыбызды, Кыргызстандын кооз табиятын, улуттук меймандостугубузду кеңири чагылдырып, жакшы жактарын көбүрөөк айтып, көрсөтөлү!” деп терс маалыматтарды таратуудан алыс болууга жана өлкөнүн туристтик жайларынын жакшы жактарын кеңири чагылдырууга чакырды.
Ак сөз! Сөзүндө калет жок. Ачыгын айтканда, учурда өлкөбүз өнүгүүнүн жолунда. Жакшы тилек – жарым ырыс. Үмүттөр арбын. Алгылыктуу аракеттерге, изги ийгиликтерге элибиз күбө. Жасалган жакшы иштерди көрбөй көз жумуу Кудайга да жакпайт. Шүгүр, шүгүрчүлүк! Эгемен мамлекетибиз тынч, элибиз ток, жерибиз бүтүн! Кудайым кут кылсын. Андыктан, “Өлкөм өнүп-өссүн! Мамлекетим өнүккөн мамлекеттердин катарында болсун! “Мамлекет мага эмне берет?” дебестен, “Мен мамлекетке эмне бере алам?” деген патриоттук сезимде, өлкөбүздүн кең келечеги үчүн элибизди жакшы маалымат, жылуу пикирлер менен камсыздап турсак, анткени, өлкө көп, мекен бирөө гана!
Жазгүл КАРБОСОВА
