Казакстандын Түркстан шаарында Түрк тилдүү ЖМКлардын «Түркстандын инвестициялык жана туристтик мүмкүнчүлүктөрү” аттуу эл аралык медиафоруму өттү.
Казакстандын Тышкы иштер министрлиги жана Түркстан облусунун акимчилиги уюштурган форумга Түркия, Азербайжан, Венгрия, Өзбекстан жана Кыргыз Республикасынын журналисттери катышты. Форум боордош түрк элдеринин журналисттеринин алакасын бекемдөө жана облустун туристтик мүмкүнчүлүгүн кеңири таанытууну көздөдү.
Үч күнгө созулган иш-чараларда басма сөз өкүлдөрү Түркстан шаарындагы эки жылдын ичинде курулган жана жаңыдан курулуп жаткан өнөр жай жана социалдык объектилерин аймактын кооз тарыхый туристтик орундарын аралап көрдү.
Түркстан облусунун акими Өмүрзак Шүкеевдин айтымында, 2020-жылы облустун негизги капиталына 703 миллиард теңге инвестиция тартылган, бул 2019-жылга салыштырмалуу 60%га көп. Анын ичинде чет элдик инвестициялардын көлөмү 112 миллиард теңгени түзгөн. Демек, шаардын гүлдөп-өнүгүүсүнө каражат бар.
Форумдун алкагында чет элдик ММК өкүлдөрү жаңыдан ачылган казакстандык «Тurkistan» телеканалынын имаратына барышты. Мында «Тurkistan» телеканалы менен Түркия, Азербайжан, Өзбекстан жана Кыргыз Республикасынын мамлекеттик телеканалдары ортосундагы кызматташтык жөнүндө меморандумга кол коюу аземи болду. Кыргыз-казак алакасы боюнча кызматташуу меморандумуна ЭлТР мамлекеттик телерадио компаниясынын башкы директору Эрлан Догдурбеков жана «Тurkistan» медиа холдинги ЖШКсынын башкы директору Ерлан Нуров колдорун коюшту.
ЖМК өкүлдөрүнүн катышуусунда түрк тилдүү акын Хожа Ахмед Яссауинин күмбөзүнүн жанындагы Ботаникалык бакка көчөттөр отургузулду. ЖМКнын аталыштары «Түрк өлкөлөрүнүн журналисттер аллеясынын багындагы» тактайчага жазылды. Жазмаларда «ЭЛТР», «Пирамида телеканалдары жана «Кыргыз Туусу» гезити бар.
Түркстан сапарында түрк тилдүү мамлекеттердин кабарчылары түрк калктарынын эзелки ыйык шаарынын илгерки архитектурасын сактап, заманбап шаарга айланганынын күбөсү болушту.
Белгилей кетсек, Тунгуч Президент Н.Назарбаевдин 2018-жылдын июнь айындагы жарлыгы менен Оң түштүк Казакстан облусунун аталышы “Түркстан” болуп өзгөрүп, калкы бир миллиондон ашкан Шымкент шаарынан облус борбору райондун борбору Түркстан шаарына көчүрүлгөн.
Назарбек БАЙЖИГИТОВ
