12-апрель – адам баласынын космоско учканына 60 жыл толду. 60 жыл мурда орус космонавты Юрий Гагариндин космоско учушу дүйнөлүк тарыхтагы бурулуш учур болгон. Бул күнү анын атын бүткүл планета билген. Ошол күндөн тартып космостук учуулардын тарыхы башталган.
Адам баласынын космоско учканынын 60 жылдык юбилейине карата Петр Дубров жана Олег Новицкий НАСАнын астронавты Марк Ванде Хай менен чогуу станцияга ушул жылдын 9-апрелинде «Союз МС-18» кемесинде учуп барышкан. Ушул эле кеме менен 17-апрелде Кудь-Сверчков, Рыжиков жана америкалык астронавт Кэтлин Рубин Жер шарына кайтып келишет.
1961-жылы 12-апрелде Юрий Гагарин советтик «Восток-1» космос кемеси менен 106 мүнөттүн ичинде орбитаны бир ирет айланып, аман-эсен жерге конгон. Ал оболу Казакстандагы “Байкоңур” космос майданынан Москва убактысы боюнча саат 09:07де учуп чыккан. Орбитада жүргөндө ал өзүнүн алган таасирлери тууралуу үн тасмага сүйлөгөн, тамак жеген, суусундук ичкен, айтор, өндүрүштүк жеңил сыноолорду жүргүзгөн.
2011-жылы, советтик космонавт Юрий Гагариндин космоско учкандыгынын 50 жылдыгын утурлай БУУнун Башкы жыйыны 12-апрелди Адамзаттын космоско учуу күнү деп жарыялаган.
Асел Барыктабасова
