АКШда эмдөөлөргө карабастан күн сайын аныкталган COVID-19 жугуу учурларынын саны өсүп жатат деп билдирди CNN телеканалынын маалыматына таянган ТАСС агенттиги.
Джонс Хопкинс университетинин маалыматы боюнча акыркы 7-8 күндөн бери суткасына 67 миңден ашык жаңы учурлар катталууда. Бул бир ай мурдагы көрсөткүчтөрдөн дээрлик 25%га көп.
Бүгүнкүгө чейин өлкөнүн 40% калкы же 132 миллиондон ашык адам бир жолу, 85 миллиону – 25,7%га жакыны эки жолу эмдөө алышты. АКШ коронавирус жуккандардын саны (31,7 млн) боюнча дүйнөдө биринчи орунда келе жатат.
