Үстүбүздөгү жылы Тайпейде өткөн Дүйнөлүк Мастерлер Оюндарында 105 жаштагы тай спортчусу Саван Жанпрам төрт алтын медаль утуп, дүйнө жүзүндөгү спорт сүйүүчүлөрүн таң калтырды. Бул тууралуу people.com маалыматтык агенттиги билдирип, спортчунун 100 метрлик жарыш, найза ыргытуу, диск ыргытуу жана ядро ыргытуу боюнча мелдештерге катышкандыгын кабарлады.
Саван Жанпрам 100 жаштан жогорку курактагы категорияда жалгыз катышуучу болду. Андан мелдеште финишке жетүү жана спорттун түрү боюнча талаптарды кынтыксыз так аткаруу талап кылынып, спортчу жеңишке жетишти. Бул ийгиликтер менен анын жалпы медалдарынын саны 60ка жетти.
Саван Жанпрам башталгыч мектептин директору болуп иштеген. Ал 80 жашка чыккандан кийин, досторунун көпчүлүгү ооруп, төшөктө жатканын көрүп, ден соолугун чыңдоо максатында машыгууга киришкен. Анын кызы Сирипан, 73 жашта. Ал да жеңил атлетика менен алектенет.
Жанпрам күн сайын жөө басып, жумасына үч-төрт жолу чуркайт. Ал эрте туруп, жетиштүү уктап, туура тамактанууга көңүл бурат. Анын айтымында, «жакшы жеп, жакшы уктап, күнүмдүк жашооңду тартипке салсаң, ден соолугуң чың болот» .
Бул жылкы Дүйнөлүк Мастерлер Оюндарында 107 өлкөдөн 26 миңге жакын спортчу катышты. Жанпрамдын келерки, 2027-жылы Японияда өтө турган оюндарга катышуусу ден соолугуна жараша болот.
Саван Жанпрамдын окуясы жаш курак спортко тоскоол болбой тургандыгын жана активдүү жашоо образы узак жана сергек жашоого жол ачарын далилдеген үлгү болду.
