19- майда Кыргыз Республикасынын Маданият, маалымат, спорт жана жаштар саясаты министрлигинде Кыргыз Республикасынын Эл артисти режиссер Артык Сүйүндүковго Россиянын Кинематографиялык искусство академиясынын «Ника» сыйлыгы жана Калькуттада өткөн эл арлык кинофестивалдын “Мыкты режиссура” номинациясынын сыйлыктарын министр Кайрат Иманалиев тапшырды.
Эске салсак, «Шамбала» тасмасы «КМШ жана Балтика өлкөлөрүнүн мыкты тасмасы» номинациясында жеңишке жетип, “Ника” сыйлыгына татыган. Сыйлоо аземи 2021-жылы 25-апрелде Москва шаарында өткөн.
“Ника” — орус кинематографиялык искусство академиясы тарабынан негизделген улуттук кинематографиялык сыйлык. Сыйлыктын ар бир номинация боюнча жеңүүчүлөрүнө Самотракиядагы канаттуу байыркы грек кудайы Никанын (автору — скульптор Сергей Микульский) статуэткалары тапшырылып келет.
Мындан тышкары ,ушул эле «Шамбала» тасмасын койгону үчүн Артык Сүйүндүков Калькуттада өткөн эл аралык кино фестивалда “Мыкты режиссура” сыйлыгына татыган.
«Шамбала» тасмасы Чыңгыз Айтматовдун “Ак кеме” повестинин негизинде 2020-жылы тартылып бүтүп, дүйнөлүк премьерасы Шанхайда өткөн эл аралык фестивалда ушул эле жылдын июль айында көрсөтүлгөн.
