Жети-Өгүз райондук соту Айсулуу Мукашеваны мыкаачылык менен өлтүрүүгө шектелип жаткан кишини эки айга камакка алуу чечимин чыгарды. Бул тууралуу маалыматты Ички иштер министрлигинин (ИИМ) маалымат кызматы тастыктады.
Маалыматка караганда, кылмыш иши боюнча иликтөө иштерин ИИМдин Тергөө кызматы жүргүзөт.
Эске салсак, бул иш коомчулукта чоң резонанс жаратып, социалдык тармактарда кызуу талкуу жараткан. Учурда шектүүгө карата Кылмыш-жаза кодексинин тиешелүү беренелери боюнча иш козголуп, тергөө амалдары жүрүп жатат.
ИИМ окуя боюнча кошумча маалыматтар иликтөөнүн жүрүшүндө берилерин белгиледи.
