Кыргызстандын грек-рим күрөшү боюнча курама командасынын мүчөсү Акжол Махмудов дүйнө чемпионатынын финалына чыгып, Олимпиада оюндарына жолдомо утту.
16-сентябрдан 24-сентябрга чейин Сербиянын Белград шаарында өтүп жаткан Дүйнө биринчилигине Махмудов 77 кг чейинки салмак ченинде катышып, 1/16 финалдык баскычтан тарта күч сынашууда.
Махмудов аталган мелдеште норвегиялык, египеттик, өзбекстандык балбандарды утуп, жарым финалга чыккан. Ал эми жарым финалдык беттеште япониялык спортчу Нао Кусака менен күч сынашып, аны 7:5 эсебинде жеңди.
22-сентябрда өтчү финалдык беттеште Акжол Махмудов азербайджандык Санан Сулейманов менен кез келет.
Белгилей кетсек, Айпери Медет кызы Дүйнө чемпионатында күмүш медаль утуп, алгачкылардан болуп 2024-жылы Парижде өтчү Олимпиада оюндарына лицензия утту. Ошондой эле Айсулуу Тыныбекова дагы финалга чыгып, Олимпиадага жолдомо алды.