Кумтөрдөн түшкөн кирешенин көлөмү 2025-жылдын жыйынтыгы боюнча 124 млрд 216 миллион сомдон ашты. Бул тууралуу Президенттик Администрациянын маалыматтык саясат бөлүмүнүн башчысы Дайырбек Орунбеков өзүнүн социалдык тармактагы баракчасында маалымдады.
Аны менен катар Орунбеков жылдын соңуна чейин алтын өндүрүүнүн көлөмү 12 тоннага жетерин билдирди.
«Ушул кирешелер мамлекетибиздин казынасына түшүп, элдин кызыкчылыгына жумшалып жатат. Кумтөргө чет элдик компания ээлик кылган жылдары 410 тоннадан ашык алтын казылып чыгып кеткен. Анын ичинде күмүш жана башка баалуу металлдары канча? Ошол, 410 тонна алтындын баасын өзүңүздөр санап көрүңүздөрчү…
Чет элдик компания иштеткен 29 жылда – Кыргызстан алган үлүштүк (дивиденд) кирешенин баарын кошкондо, болгону 101 миллион доллар болгон. Быйыл, бир жылдык эле үлүштүк кирешебиз 150 миллион доллар болуп жатат. Жыл ичиндеги жалпы кирешебиз доллар менен санаганда – 1 млрд 420 миллион доллардан ашты. Эмне дейбиз, ушул байлыктар элибизге буюрсун, мамлекетибиздин жакшылыктарына жумшалсын! Бул оомат – президентибиз Садыр Жапаровдун ондогон жылдар бою “Кумтөрдү мамлекетке алыш керек”-деп бүт кайрат-күчүн жумшап, ал үчүн оор азаптарды башынан кечирген эмгегинин натыйжасы», – деп жазды Орунбеков.
