Баткен шаарында 2021-жылдын апрелиндеги жана 2022-жылдын сентябрындагы чек ара окуяларынын курмандыктары эскерилип, “Жеңиш” паркында чек ара курмандыктарынын элесине тургузулган эстелик мемориалынын ачылышы болду. Бул тууралуу Президенттин Баткен облусундагы өкүлчүлүгүнүн басма сөз кызматынан билдиришти.
Иш-чарага Министрлер Кабинетинин Төрагасынын орун басары — УКМК төрагасы Камчыбек Ташиев, Президенттин Баткен облусундагы ыйгарым укуктуу өкүлү Абдикарим Алимбаев, Чек ара кызматынын төрагасы Уларбек Шаршеев, Дин аалымы Абдышүкүр ажы Нарматов, чек ара окуяларында каза болгон жарандардын жакындары катышып, каза болгон мекендештерге багыштап куран окуп, бата кылышты.
Белгилей кетсек, мемориалды жергиликтүү скульптор Абдисапа Калматов жасаган. Эстеликте чек ара окуясынын курмандыгы болгон кичинекей Мадинанын элеси чагылдырылган. Колундагы жети көгүчкөн — тынчтыктын, жети облустун биримдигинин символу.