Бишкекте “Бишкекасфальтсервис” муниципалдык ишканасынын кызматкерлери тарабынан жолдордогу чуңкурларды оңдоо иштери уланууда.
Муниципалитеттен билдиришкендей, учурда Жибек-Жолу проспектиси боюнча Осмонкул көчөсүнөн батыштан чыгышты карай Лермонтов көчөсүнө чейинки жолдун түштүк тарабындагы кемчиликтерди жоюу иштери жүргүзүлүүдө.
Белгилей кетсек, Осмонкул көчөсүн Чүй проспектисинен Жибек-Жолу преспектисине чейин 2024-жылга карата жолдорду капиталдык оңдоонун титулдук тизмесине киргизүү пландалууда.
Мындан тышкары, “Бишкек Парк” соода борборунун маңдайындагы, Кулатов – Ж.Пудовкин, Л.Толстой – Логвиненко көчөлөрүнүн кесилишинде, Ч.Валиханов көчөсү 1а/1 дарегинде, Ахунбаев-Токтоналиев, Орозбеков – ЧЧК, Байтик баатыр — А.Токомбаев көчөлөрүнүн кесилишиндеги кемчиликтерди жоюу иштери жүрүүдө.
Манас проспектиси менен Токтогул көчөсүнүн кесилишинде жолдун деңгээлине темир торду көтөрүп, чуңкур асфальт-бетон аралашмасы менен толтурулду.
Сүйөркулов жана Юнусалиев көчөлөрүнүн кесилишинде Орто-Сай базарынын жанындагы жолдун негизин темир-бетон менен бекемдеп оңдоо иштерин жүргүзүү пландалууда.