Оксфорд университетинин окумуштуулары коронавирус менен мурда ооругандардын иммуниттерин жана антителолорун текшерүү үчүн, вирусту кайрадан жуктуруп, изилдөө жүргүзүүнү көздөшүүдө. Бул тууралуу маалымат университеттин сайтында жарыяланды.
Изилдөө эки этап менен өтөт.
Биринчиси ушул апрель айында өтөт: изилдөөгө макулдугун берген ыктыярчыларга, Ухандан чыккан SARS-CoV-2 вирусунун «минималдуу » дозасы куюлат. Окумуштуулардын айтымында, вирустун мындай дозасы изилдөөгө катышып жаткан адамдарга коркунуч жаратпайт. Оорунун белгилери да билинер-билинбес болот. Катышуучулар 17 күндүк карантинге ооруканага жаткырылышат. Бул аралыкта изилдөөлөр жүргүзүлмөкчү.
Экинчи этаптын башталышы жай мезгилине белгиленди. Бардык ыктыярдуу катышуучуларга вирустун «стандарттык» дозасы куюлат.
Изилдөөгө бардыгы болуп 18 жаштан 30 жашка чейинки, буга чейин коронавирус менен ооруган 64 адам катышат. Бул изилдөө 12 айга созулат.
Эгер, катышуучулардын биринде коронавирустун белгилери байкалса, аларга Regeneron Pharmaceuticals деп аталган америкалык компаниянын моноклондук антителолору (иммундук клеткалардан бөлүнүп чыккан антитело) куюлат.
Аталган университеттин профессору Хелен МакШейндин айтымында, мындай изилдөөлөр адамдын COVID-19 каршы көрсөткөн иммундук реакциясын аныктап, диагностиканы туура жүргүзүүгө багытталган тесттерди иштеп чыгууга жол ачат.
Британияда COVID болгондорго кайрадан вирус жуктурушат…
