Коронавирус пандемиясы башталгандан бери дүйнө жүзүндө 140 миллиондон ашуун адам ооруга чалдыккан. АКШдагы Джон Хопкинс университетинин маалыматына караганда, акыркы бир жуманын ичинде дүйнөдө күн сайын 12 миңге чукул адам коронавирустан көз жумуп, илдеттин курмандыгына айланышты. Расмий маалыматка ылайык, бир күндө дүйнөдө 700 миң адамдан вирус тастыкталып жатат, бул илдеттин кайрадан күч алгандыгынын белгиси дешет адистер.
Коронавирустун жайылышы жана илдеттен каза болгондордун эң көп учуру АКШда катталып, аталган өлкөдө 32 миллиондон ашуун адам ооруну жугузуп алган болсо, 580 миңге жакын бейтап кайтыш болгон. Кийинки орундарда Бразилия, Индия жана Франция турат. Бул мамлекеттер учурда коронавирустун үчүнчү толкуну менен күрөшүп жатышат. Мисалы, бир гана Бразилияда күнүгө 3000ден ашуун адам илдеттен көз жумууда. Индияда бир күндө 180 миң адамдын коронавируска чалдыкканы расмий ырасталган. Ал эми Европа мамлекеттеринде учурда вирустун «Британ штаммы» кескин жайылды.
Илдеттин дүйнө жүзүндө кайрадан курчуганына байланыштуу, Японияда жайкы Олимпиада оюндары кайрадан жылдырылышы мүмкүн. Себеби, бул өлкөдө ооруга жалпы 525 миңден ашуун адам кабылып, 9584 адам илдеттен көз жумган.
