Эгемендүүлүгүбүзгө -30 жыл
Кыргыз Республикасынын эмгек сиңирген артисти Айчүрөк Иманалиева:
-Эгемендүүлүгүбүздү колго алганыбызга 30 жыл болду. Бул улут үчүн чоң майрам. Жалпы кыргызстандыктарды майрамы менен кызуу куттуктаймын. Дайыма түндүгүбүздөн күн көрүнүп, баалуулуктарыбызды бек кармаган бийик элден бололу. Негизи бул 30 жыл биздин маданият тармагы үчүн өтө ийгиликтүү жылдардан болду. Жаңычылдыктар киргизилди. Маданият өкүлдөрүнүн катары жаш таланттар менен толукталды. Өз мамлекетибиздин атынан чет өлкөлөргө чыгып, сынактарга катышып келип жаттык. Желегибизди бийик көтөрүп, сынактарда сыймыктана жүрдүк. Мен ушул багытта жасалган иштер менен мактана жана сыймыктана алам. Эгемендүүлүк бизге өнүгүүнү гана берди.
Кыргыз Республикасынын эл артисти Гүлсара Ажибекова:
Эгемен өлкө болуп өз алдыбызча түтүн булатканыбызга 30 жыл убакыт болду. Мен да убагында замандаштарым менен бирге бул азаттыкты кубануу менен кабыл алгам. Өзүм актриса болгондуктан 30 жылда маданият тармагында кино тартуу тармагынын жандангандыгын баса белгилегим келет. Албетте 30 жылда көбүнчө коммерциялык багыттагы тасмалар тартылып жатты. Бирок, бул да болсо чоң жылыш болду. Тарыхый тасмалардын тартылышы да колго алына баштады. Таланттуу жаш актрисалар, актёрлор, режиссёрлор өсүп чыгышты. Көп тасмалар эл аралык сыйлыктарга татыды. Андыктан эгемендүүлүк биздин маданияттын да өз алдынча өнүгүүсүнө алып келди деп айта алам. Учурдан пайдаланып кыргыз элимди 30 жылдык мааракебиз менен кызуу куттуктаймын!
Кыргыз Республикасынын эмгек сиңирген артисти Асель Турдалиева:
Эгемендүүлүк алган жылдары маданият тармагында көп кыйынчылыктар болду. Театрда иштеген өнөр адамдары сахнаны таштап, үйүндө торт жасап саткан абалга жеткен. Бирок, ошого карабай маданият акырындык менен өз жолуна түшө алды. Мен эстрада жанрында ырдаган ырчылар тууралуу айтайын. Биздин кыргыз эстрадасында 90-жылдары Беродор Борбиев, Алина Жетигенова, Гулнара Кахарова, Мерген Турган, Айчүрөк Иманалиева деген ырчылар өздөрүнүн тушоосун өздөрү кесип сахнага чыгышкан. Бул азаматтар эгемен өлкөдө эстрада жанрынын өнүгүшүнө чоң салым кошушту десем жаңылышпаймын. Андан кийин да жаш таланттардын толкуну келди. Алар да маданият тармагында үзүрлүү эмгектеништи. Азыр да таланттуу жаштарыбыз аткаруучулук өнөрдү татыктуу өргө тартып бара жатышат. Мен эгемендүүлүк алгандан кийинки жылдары жетишкен эки нерсени белгилегим келет . Биринчиси, кыргыз элинин акыркы жылдары элдик, салттуу музыкага маани бере баштагандыгы. Улуттук баалуулуктарга болгон сый-урмат ойгонду. Биз кыргыз болуп туруп, комуздун үнүн укпай калган мезгилдер болгон да. Ал эми экинчи жагы эгемен өлкөнүн таланттары катары маданият өкүлдөрү чет өлкөлөргө барып эл аралык сынактарга катышып жатышат. Бул биздин чоң жетишкендигибиз болду.
Жазгүл Кенжетаева
