16- майда Кыргыз Республикасынын Маданият, маалымат, спорт жана жаштар саясаты министрлиги Энелер күнүнүн урматына Каракол шаарындагы Касымалы Жантөшев атындагы Ысык- Көл облустук музыкалуу драма театрында «Энелер элдин тиреги» аттуу театрлаштырылган майрамдык салтанат өткөрдү. Иш-чарада министр Кайрат Иманалиев «Алмустактан элди эл кылган, үзүлгөнүн улаган, чачылганын жыйнаган энелерибиз болгон. Умай энеден калган улуулук кыргыз энесине берилип, кылымдарды суктантып келет. Чыйырды, Каныкей, Айчүрөк энелерибизден тарта даңазалуу Курманжан Даткадай кайратман, согушту, азап тозокту, оор сыноолорду башынан өткөрүп, жүрөгү тилинип турса да эрдик менен жеңген энелерибизге таазим кылам», — деди ал. Салтанаттуу иш- чара К. Жантөшев атындагы Ысык- Көл облустук музыкалуу драма театрынын жана Каракол шаардык Маданият үйүнүн артисттери тарабынан даярдалып, «Энелердин жүрөгү токтобосун» аталыштагы театралдаштырылган пролог жана адабий — музыкалуу концерттик программа менен коштолду.
“Энелер элдин тиреги»
