ИИМдин Кылмыш иликтөө башкы башкармалыгы жарандарга жаңы каржы пирамидаларынын курмандыгы болуп калуу коркунучу бар экенин эскертип, жеңил жана тез арада киреше алып келүүчү ар кандай күмөндүү келишимдерге катышпоону суранат. Тактап айтканда, каржы пирамидалары ар кандай жолдор менен өздөрүнүн алдамчылык схемаларын жашырат. Ал эми мындай күмөндүү уюмдардын бирден бир максаты – тез арада пайда алып келген убадаларына ишенген жарандардын акчасын өздөрүнө тартуу экенин түшүнүү керек. Каржы пирамидаларынын пайда болгонуна көп убакыт өткөнүнө карабастан, алар дагы эле ишенчээк кардарларды таап, алардан акча алуунун жаңы ыкмаларына өтүшкөн. Каржы пирамидасынын негизги айырмалоочу өзгөчөлүгү-бул жогорку кирешелүүлүк жана инвестицияланган акчаны тез кайтаруу убадасы. Алар ар кандай жеңилдиктерди, ар бир тартылган жаңы катышуучу үчүн бонустарды сунуштай алышат, эгерде кардар дагы эки салымчыны алып келсе, укмуштуудай пайыздар болот деп убада беришет.
2022-жылдын 12 ай ичинде каржы пирамида фактылары менен жалпысынан 1052 кылмыш иши тергелген, алардын ичинен эски жылдан 170 кылмыш иши өткөн. Тергөөнүн жыйынтыгы менен 765 кылмыш иши соттук кароого жиберилген. Калгандары боюнча иликтөө иштери жүрүп жатат. Кылмыш-жазык процессуалдык кодексинин 27 жана 246-беренелеринин негизинде өндүрүштөн кыскартылган же токтотулган кылмыш иштери бар. Жабырлануучулардын саны 1000 ашык адамды түзөт.
Жалпы келтирилген материалдык чыгым 273 миллион сомдон ашык жана 1 млн. 579 миң АКШ долларынан ашык сумманы түзөт.
Каржы пирамидаларынын ишмердүүлүгү фактылары боюнча кылмыш иши козголгон: “Мега Инвест”, “Элиза үй буюмдары”, “Асыл айымдар”, “Финико”, “Файв виндс ассет мейважмемт”, “Ордо-Мурас”, “Аруке”, “Жүрөкө-Жүрөк”, “Балыкчы Ынтымагы”, “Мега Инвест”, “Аппи Трэвелс”, «Алмаз Авто», “Эл Биримдик”, “Нворк”, “Куестро Ворд”, “ОК платформа” ж.б.. Каржы пирамидалары өз ишмердүүлүгүн Бишкек, Ош, Чүй, Нарын, Ысык-Көл, Жалал-Абад, Талас облустарынын аймагында жүргүзүшкөн. ИИМдин Кылмыш иликтөө башкы башкармалыгы жарандарга акчаны күмөндүү уюмдарга салуу кооптуу экенин эскертет. Каржы пирамидалар каржы уюмдары эмес жана депозиттерди кабыл алууга лицензиясы жок. Жарандар каржы пирамидаларына акча салуудан мурда аларды жоготуу коркунучу бар экенин толук түшүнүшү керек. Анын катышуучуларынын ортосундагы мамиле өз ара ишенимге негизделген, демек, акчаңыздын коопсуздугуна эч ким кепилдик бере албайт.
ИИМдин Басма сөз кызматы