Ирандын Ислам революциясынын сакчылар корпусу Израилге каршы аскердик операциялар еврей мамлекети жок болгуча уланарын билдирди. Бул тууралуу РИА Новости жазды.
Корпустун расмий билдирүүсүндө мындан ары жасалчу операциялар мурдагыга салыштырмалуу андан да катуу жана кыйратуучу болору белгиленген.
«Маанилүү объектилерге багытталган натыйжалуу жана кыйратуучу соккулар кылмыштуу режим толук жок болгонго чейин токтобойт», — деп айтылат билдирүүдө.
Эске салсак, 13-июнга караган түнү Израилдин армиясы Иранга каршы кеңири масштабдуу аскердик операция баштаган. Израилдин аба күчтөрү Ирандагы бир нече аскердик жана өзөктүк объектилерге, анын ичинде Тегеран шаарына сокку урган.
Чабуулдарда Ирандын Куралдуу күчтөрүнүн Башкы штабынын жетекчиси, Ислам революциясынын сакчылар корпусунун командачысы жана бир катар илимпоздор каза болгону кабарланды. Ошондой эле Натанз жана Фордо шаарларындагы өзөктүк объектилер бутага алынган.
Бул окуядан кийин Ирандын жогорку лидери аятолла Али Хаменеи элге кайрылып, Израилдин аракетин “кылмыш” деп атап, бул режимди “коркунучтуу тагдыр” күтүп турганын билдирген.
Иран тарап жооп катары “Чындык убадасы — 3” деп аталган операциянын алкагында Израилдеги бир нече аскердик объектилерге ракеталык сокку урганын маалымдады.
