Жакында эле Алматы шаарында спорттук күрөштүн түрлөрү боюнча Токио олимпиадасына жолдомо берилчү турнир жыйынтыкталды. Бул турнирде Кыргызстан курамасы 6 жолдомо алып кайтты. Ага чейин 2019-жылы Нур-Султан шаарында өткөн дүйнөлүк биринчиликте Айсулуу Тыныбекова менен Атабек Азисбеков жолдомо алышкан болчу. Жыйынтыгында грек –рим жана эркин күрөш боюнча жигиттерибиз менен кыздарыбыздын 8 жолдомосу бар. Алматыдагы лицензиялык турнир аяктаган соң 13-апрелде күрөштөн Азия биринчилиги башталды. Бирок, бул мелдеште олимпиадага жолдомо ойнотулбайт.
Олимпиадага жолдомо алуу жагынан азырынча АКШ курамасы алдыда. Алардын бүгүнкү күнгө карата 15 жолдомосу бар. Россиялыктарда – 13, Куба – 12 жолдомого ээ. Эми, Токио олимпиадасына катышууга укук берчү жыйынтыктоочу турнир 6-9-май күндөрү Болгарияда өтөт. Биздин жолдомо алууга жетишпеген балбандарыбыз бактыларын Болгарияда сынап көрүшөт.
