"Эркин-Тоо"

Кочкордо акимдин орун басары пара берүүгө шектелип кармалды

Кочкор районунун акиминин биринчи орун басары жана башкы адиси УКМК кызматкерине пара берүү фактысы менен кармалды. Бул тууралуу Улуттук коопсуздук мамлекеттик комитети билдирди.

Маалым болгондой, УКМК кызматкерлеринин текшерүүсүндө Кочкор райондук акимиатында Өкмөттүн токтому менен бекитилген ченемдик-укуктук актылардын так сакталбаганы аныкталган. Ээлеген кызматынан бошотууга чейин жеткире турган мыйзам бузууларды жашыруу үчүн акимдин биринчи орун басары менен башкы адиси УКМК кызматкерине 30 миң сом пара сунуштаган.

Шектүүлөр УКМК кызматкерине 30 миң сомду Mbank электрондук эсеби аркылуу которушкан. Фактынын негизинде пара бергендер кармалып, тергөө абагына камакка алынган.

Учурда бул кылмышка катышы бар башка кызматкерлерди аныктоо чаралары көрүлүп жатканы айтылат маалыматта.

Пример HTML-страницы
error: Content is protected !!