Казакстандын президенти Касым-Жомарт Токаевдин Кыргызстанга жасаган расмий сапарынын алкагында бүгүн, 22-августта, эки өлкө ортосунда бир катар маанилүү документтерге кол коюлду.
Президент Садыр Жапаров жана президент Касым-Жомарт Токаев «Кыргыз Республикасы менен Казакстан Республикасынын ортосундагы 2025–2027-жылдарга карата кызматташуу боюнча комплекстүү планды жактыруу жөнүндө» Жогорку мамлекеттер аралык кеңештин чечимине кол коюшту.
Мындан тышкары төмөнкү документтер кабыл алынды:
-
Мамлекет башчыларынын биргелешкен билдирүүсү;
-
Кыргыз-казак мамилелеринин ар кыл чөйрөлөрүндөгү маселелер боюнча Жогорку мамлекеттер аралык кеңештин чечими;
-
2030-жылга чейин товар жүгүртүүнү көбөйтүү боюнча жол картасы;
-
Алматы облусунда дүң-бөлүштүрүү борборун куруу тууралуу меморандум;
-
Ташылуучу автотранспорт каражаттары жана товарлар жөнүндө маалымат алмашуу боюнча меморандум;
-
Автомобиль транспорту менен ташууларда навигациялык пломбаларды колдонуу боюнча пилоттук долбоор тууралуу меморандум;
-
Мамлекеттик чек ара аркылуу өткөрүү пункттарына өзгөртүүлөрдү киргизүү жөнүндө протокол;
-
Чек ара кызматы үчүн кадрларды даярдоо жаатындагы макулдашуу;
-
Элчиликтер үчүн Астана жана Бишкектен имараттар менен жер тилкелерин акысыз берүү тууралуу макулдашуу;
-
Пенсиялык камсыздоо жаатында маалыматтык өз ара аракеттенүү боюнча макулдашуу;
-
Маданият тармагында кызматташууну кеңейтүү боюнча 2025–2027-жылдарга иш-чаралар планы;
-
Радиожыштыктарды координациялоо боюнча макулдашуу;
-
Туризм тармагында кызматташуу боюнча 2025–2026-жылдарга иш-чаралар планы;
-
Улуттук телерадиокорпорация менен Казакстандын президентинин телерадиокомплексинин ортосундагы кызматташуу меморандуму.
Кол коюлган документтер саясий, соода-экономикалык, инвестициялык, транспорттук, социалдык жана маданий тармактардагы кыргыз-казак кызматташтыгын мындан ары тереңдетүүгө багытталганы белгиленди.
