Москвадагы Никита Михалковдун «12-чеберкана» театрында «Бриллиант көпөлөк» эл аралык киносыйлыгынын тапшыруу аземи өттү. Бул тууралуу уюштуруучулар кабарлашты.
Иш-чарада кыргызстандык кинооператор Талант Акынбеков «Кара, кызыл, сары» тасмасын тарткандыгы үчүн «Мыкты кинооператор» наамына ээ болду.
Сыйлыктын башкы байгеси — «Эң мыкты тасма» наамы кытайлык режиссёр Сюй Чжэндин «Агымга каршы» тасмасына ыйгарылды. Тасманын жаратуучулары 1 миллион долларлык акчалай сыйлык алышат.
Сынакка маданий жана руханий жакындыгы бар мамлекеттердин тасмалары катышты. Алардын катарында Орусия, Кытай, Түркия, Кыргызстан, Тажикстан, Түркмөнстан, Сербия, Өзбекстан, Венесуэла, Куба, Сенегал, Түштүк Африка, Пакистан, Беларусь, Индонезия, Вьетнам, Иран жана башка өлкөлөр бар.
«Бриллиант көпөлөк» — Евразия кинематографиялык искусство академиясынын негизги иш-чарасы. Сыйлыктын максаты — кино аркылуу салттуу жана универсалдуу баалуулуктарды сактоо, руханий мурастарды, маданий иденттүүлүктү жана гуманизмди жайылтуу.
