Кыргыз Республикасынын Президенти Садыр Жапаров Кытай Эл Республикасынын мамлекеттик кеңешинин мүчөсү, тышкы иштер министри Ван И менен Душанбеде сүйлөшүүлөрдү жүргүздү. Бул тууралуу Президенттин Администрациясынан билдиришти.
Жолугушууда коопсуздук жана коргоо, соода-экономикалык кызматташтык, инвестиция тартуу жана башка тармактарда Кыргызстан менен Кытайдын достук жана ынак коңшулаштык мамилелерин ар тараптуу өнүктүрүү маселелери боюнча пикир алмашуу болду.
Садыр Жапаров регионалдык коопсуздук жана туруктуулукту камсыздоо Кыргызстан менен Кытайдын тышкы саясатында негизги артыкчылыктарынын бири болуп келерин белгилеп, акыркы бир нече жылда, анын ичинде пандемияга карабай, Кытай Кыргызстандын экономикасына инвестиция тартуу жана товар айлантууда алдыңкы орундардын бирин ээлеп келе жатканын айтты.
«Кыргызстан Кытайды негизги соода инвестициялык өнөктөштөрдүн бири катары карайт жана өз ара сооданы өнүктүрүүгө, өз ара кызыкчылык туудурган, биргелешкен инвестициялык долбоорлорду ишке ашырууга кызыкдар.
Ал учурда өлкөдөгү инвестициялык климатты жакшыртуу боюнча активдүү чаралар көрүлүп жатканын кошумчалады. Аны менен бирге соода-экономикалык жана маданий-гуманитардык кызматташтыкты активдештирүү, ошондой эле жогорку стратегиялык мамилелерди колдоо максатында, кыргыз тарап эки өлкө ортосундагы дайымкы аба каттамдарын жандантууну маанилүү деп эсептейт», -деп жазылат маалыматта.
«Кытай-Кыргызстан-Өзбекстан» темир жолунун курулушу боюнча маселени талкулоодо Президент Садыр Жапаров долбоорду ишке ашыруу Кыргызстан үчүн эле улуттук маанилүү долбоор эмес, жалпы эле регион үчүн маанилүү экенин жана кыргыз тарап бул багытта активдүү диалогду улантууга даярдыгын айтты.
Кытайдын мамлекеттик кеңешинин мүчөсү, тышкы иштер министри Ван И Кыргызстан менен ынак коңшулаштык мамилени чыңдоого кызыкдар экенин билдирип, өлкөнүн социалдык-экономикалык өнүгүүсүнө колдоо иретинде Кыргызстанга 650 млн юань (100 млн АКШ доллары тегерегинде) бөлүүгө даярдыгын белгиледи.
Ошондой эле Ван И КЭР өкмөтү коронавирустук инфекцияга каршы кытайлык вакцинанын кошумча партиясын (1 млн доза) жана медициналык каражаттарды берүү чечимин кабыл алганын айтты.
Мамлекеттик кеңештин мүчөсү кытай тараптын автоунаа жолдорун куруу жана ирригациялык түйүндөрдү кеңейтүү тармактарында биргелешкен долбоорлорду ишке ашырууга кызыгуусун билдирди.
Мындан сырткары, тараптар регионалдык коопсуздук маселелерин жана Афганистан Ислам Республикасындагы кырдаалды талкуулап, эки өлкөнүн компетенттүү органдарынын бул багытта өз ара аракеттенүүсүнүн маанилүүлүгүн белгилешти.
Белгилей кетсек, жолугушуу Президент Садыр Жапаров ЖККУнун Жамааттык коопсуздук кеңешинин саммитине жана ШКУга мүчө-мамлекеттердин башчыларынын отурумуна катышуу үчүн иш сапары менен жүргөн Душанбе шаарында өттү.