Кытай авиакыймылдаткычтарды чыгаруучу “Мотор Сич” заводу боюнча Украинага 3,6 миллиард долларлык доо койду деп билдирди «Страна. UA».
Аталган заводдун көзөмөл пакети 2017-жылы кытайлык компанияларга өткөн. Бирок, быйыл январь айынын аягында Украинанын президенти Владимир Зеленский заводду улутташтырып, мамлекеттин менчигине алуу тууралуу жарлыкка кол койгон. Ушундан кийин 25-мартта Кытайдын Тышкы иштер министрлигинин расмий өкүлү Хуа Чуньин Кытайдын өкмөтү Украинанын бийлигин кытайлык компаниялардын жана инвесторлордун мыйзамдуу укуктарын сактоого чакырды деп билдирген.
«Мотор Сич» газотурбиналуу авиакыймылдаткычтарды жана өнөр жайлык газотурбиналуу жабдууларды өндүрүү жана тейлөө менен алектенет. 2014-жылы Киев заводдун продукцияларын негизги заказ берүүчү Россияга сатуудан баш тарткандан кийин, ишкана кризистик жагдайга кабылганда, жардамга кытайлык инвесторлор келген.
