Колорадо штатындагы Форт Коллинс шаарында мүйүзгө окшош шишиктери бар коёндор байкалууда. Интернетте тараган сүрөттөр коомчулукта “Франкенштейн коёндор”, “зомби коёндор” сыяктуу каймана аттардын пайда болушуна себеп болду. Бирок адистер бул жаныбарлар элестетилгендей коркунучтуу эмес экенин билдиришти.
Адистердин айтымында, коёндор Shope папилломавирусу деп аталган вируска чалдыккан. Бул оору негизинен зыянсыз болуп, коёндордун бетинде сөөл сымал шишиктердин өсүшүнө алып келет. Эгер шишиктер көз же ооздун тегерегинде жайгашып калбаса, коёндорго олуттуу зыян келтирбейт. Көпчүлүк учурларда жаныбарлардын иммундук системасы вирус менен өзү күрөшүп, шишиктер жоголот.
Вирус 1930-жылдары америкалык илимпоз, профессор Ричард Э. Шоуп тарабынан ачылган. Аталган илдет илгертен келе жаткан жакалоп — мүйүзү бар коён жөнүндөгү уламыштарга негиз болушу мүмкүн экени айтылат. Ошондой эле бул вирус вирустар менен рак ооруларынын байланышын изилдөөгө түрткү берген.
Колорадо жапайы жаратылыш жана жаратылыш ресурстары департаментинин өкүлү Кара Ван Хус билдиргендей, мындай коёндорду жай мезгилинде көрүү көнүмүш көрүнүш. Себеби вирус көбүнесе бүргөлөр жана кенелер аркылуу жугат.
Ал вирус коёндон коёнго жугушу мүмкүн экенин, бирок адамдарга же үй жаныбарларына кооптуу эместигин белгиледи.
