Мексикада COVID-19 илдетинен каза болгондордун санын кайрадан такташты, жыйынтыгында буга чейинки көрсөтүлгөн сан 60%га өскөн. Жаңы көрсөткүчтүн негизинде Мексика коронавирустан каза болгондордун саны боюнча АКШдан кийинки экинчи орунду ээледи. Мексиканын Саламаттык сактоо министрлигинин берген жаңы маалыматы боюнча, COVID-19 илдетинен өлкөдө 321 миңден ашуун адам каза тапкан. Ушундан улам Мексиканын президенти Мануэль Лопес Обрадор коомчулук тараптан катуу сынга алынып, оппозиция аны каза болгондордун санын жашырды жана калк арасында эмдөө жүргүзүү иштерин кечеңдетти деп айыптады. Эксперттер буга чейин да илдеттин курмандыгына айлангандардын саны так айтылбай, тестирлөө жөнгө салынбай жатканын, бейтаптар үчүн орундар жетишпей, көптөгөн адамдар үйлөрүндө каза болгонун айтып чыгышкан.
