Түркияда 14-апрелден баштап өлкөдө күчөтүлгөн локдаун киргизерин өлкөнүн президенти Раджеп Тайип Эрдоган билдирген. Бул тууралуу маалыматты Hürriyet басылмасы жазып чыкты.
Жаңы эрежелер боюнча:
– кечки саат 19:00дөн таңкы 05:00ке чейин коменданттык саат киргизилет (буга чейин 21:00дөн башталган);
–коменданттык саат учурунда өлкө ичинде каттамдар толугу менен токтотулат;
– 18 жашка чейинки жана 65 жаштан жогорку жарандарга коомдук транспорт колдонууга тыюу салынды;
– коомдук тамактануу жайлары кардарларды кабыл албайт, буйрутмалар менен гана иштейт;
– Рамазан айынын соңуна чейин (12-майга чейин) коомдук топтолгон жерлердин бардыгы жабылат, той-мааракелер өткөрүлбөйт.
Worldometerдин билдирүүсүндө, акыркы суткада Түркияда COVID-19 илдетинен каза болгондордун саны рекорддук ченге жеткен. Вирус бир суткада– 59 187 адамга жукса, 273 бейтап каза болгон.
2021-жылдын 30-мартынан баштап Түркияда дем алыш күндөрү толугу менен карантин кайрадан киргизилген.
Түркия локдаунду күчөттү: акыркы суткада 60 000 адамга вирус жуккан
