Подмосковьеде 6 жашар алсыз кыз табылган. Кыз жер үйлөрдүн биринде таштанды мүшөктөрдүн арасында жашаптыр. Анын гигиеналык каражаты, керебети тургай, кийими да жок. Жер үйдө кыз менен бирге 19 мышык жашаган. ММКлардын жазганына караганда, “кис-кис” деген чакырыкка гана көңүл бөлөт. Ал тургай, адамча баса албай жылып жүрөт.
Полициялар кайгуулда жүргөндө шектүү адамды байкап, анын изине түшүшкөн. Алар жеке менчик үйлөрдүн бириндеги кыйынчылык тарткан 6 жашар наристени көрүшөт. Полициялар кызды ооруканага жеткирип, анын энесин жакында эле табышкан. Имиштерге караганда өз кызын 2018-жылы эле таштап койгон. Аял өзү улуу кызы менен башка жерде жашачу. Учурда улуу кызы да медицина кызматкерлеринин көзөмөлүнө алынды.
“Кызыңды канча убакытка таштадың эле?”, — деп сураган тиешелүү органдардын өкүлдөрүнө “Беш күнгө. Төрт күн”, — деп жооп берген кыздын энеси. “Кызың бул жерде жалгызбы?”, — деген суроосуна “Аны Александр карап жаткан”, — дейт аял. Александр 65 жашта. Ал кыздын энесинин жарандык күйөөсү экен.
“Ага караганда бомждар таза кийинишет. Ал жүрчү, кандай дээримди билбейм? Таштандыларды аңтарчу”, — дейт кошунасы Кокерев Сергей. Кошуналардын айтымында, алардын ити жок болсо да иттин тамагын көп сатып алчу.
Россия Федерациясынын Президентине караштуу баланын укугу боюнча өкүлчүлүгүнөн Анна Кузнецованын айтымында, мындай көйгөйлөр көп эле кездешет. “Бир окуяда балага тиешелүү документ берилбей калган. Ал мектептен чыгып кеткенден кийин изделген эмес. Тиешелүү ведомстволор гана издөө жарыялаганда изделе баштаган. Эмне себептен Москвадагы медициналык жайлардын биринде каттоодон өткөн баланы таба алышпаганы белгисиз. Бул сыяктуу чиеленишкен маселелер көп кездешет. Жогорудагы окуяга кыйноо фактысы боюнча кылмыш иши козголду.
