"Эркин-Тоо"

УКМК таппай жаткан Эмил Жамгырчиев кайда жүргөнүн айтты

Жогорку Кеңештин депутаты Эмил Жамгырчиев УКМКнын ага тынчсызданып, издөө жарыялаганы үчүн ыраазычылык билдирди. Бул тууралуу ал бүгүн, 11-январда журналисттердин суроосуна жооп берип жатып билдирди.

Анда эл өкүлү бир жарым айдан бери каякта жүргөнү тууралуу маалымат берип, Кыргызстандан эч жакка кетпегенин, атасы катуу ооругандыктан улам эмгек өргүүсүн алгандыгын жана өзү да тумоолоп эки жума жатканын айтты.
Ошондой эле УКМК ага карата издөө жарыялаганын алар өз милдетин аткарып жатат деп сыпаттап, ыраазычылыгын билдирди.
«Бул УКМК кызматкерлеринин түздөн-түз милдети. Себеби ар бир жаран жок болуп кетсе, издөөгө тийиш. Алар өздөрүнун кызматын аткарып жатат, ага ыраазычылык айтыш керек. Эл өкүлү болгондон кийин эми жөнөкөй кызмат эмес да, сарсанаа болуп издөө жарыялаганына мен ыраазымын. Бирок мен ошондо эле дароо Бишкекте жүргөнүм тууралуу маалымат бергем» — деди Жамгырчиев.

Атайын кызмат 26-декабрда Жамгырчиевдин жүргөн жерин аныктоого мүмкүн болбой жаткандыгын жана анын Кыргызстанда жок болуусу, чек арадан мыйзамсыз өтүп, башка өлкөдө жүргөнүнөн кабар берерин билдирген.

Кийинчерээк депутат социалдык тармактагы баракчасына Нарын облусунда экенин жазган.

Белгилей кетсек, депутат Эмил Жамгырчиев 27-ноябрга оогон түнү кесиптеши Чыңгыз Айдарбеков менен Казакстанга бара жатканда ага өлкөдөн чыгууга тыюу салынганы маалым болгон. Кесиптеши Элвира Сурабалдиева билдиргендей, Жамгырчиевди УКМКнын кызматкерлери кармап, кайра коё берген.

 

Пример HTML-страницы
error: Content is protected !!