Бишкек шаарынын вице-мэри Жамалбек Ырсалиев Бишкек — Ош жолунун 217-чакырымында жол кырсыгына кабылды.
Кырсык кечээ, 26-июлда, таңкы саат 6:00дөр чамасында болгон. Toyota Alphard үлгүсүндөгү унааны башкарып бара жаткан айдоочу уктап кетип, Токтогул районунун аймагында жол четиндеги тосмону сүзгөн.
Маалыматка ылайык, кырсыкка учураган унаанын ичинде вице-мэр жана дагы үч жүргүнчү болгон. Алар денесинен ар кандай жаракат алып, Токтогул райондук ооруканасына жеткирилген. Жабырлануучулардын бири жандандыруу бөлүмүндө жатканы бүгүн белгилүү болду.
Аталган факт Кылмыштардын жана жоруктардын бирдиктүү реестрине катталып, кырсыктын келип чыгуу себеби такталууда.
