Украинанын президенти Владимир Зеленский Орусиянын президенти Владимир Путинди кагылышуулар болуп жаткан Донбасстагы аймакта жолугушууга чакырды. Чакырууну ал өлкөдөгү коопсуздук боюнча кайрылуусунда айтып, Telegramдагы каналына жүктөдү.
Зеленский : ”Орусиянын куралдуу аскерлеринин Украинанын чек арасына жакын алып келингенине Киев тынчсызанат. Украина согуш каалабайт, бирок толук даяр. Бирок биз бардыгын дипломатиялык жол менен чечүүгө кызыкдарбыз. Эгер согуш ачылып кетсе, андан эки тарап тең бирдей жабыр тартат. Бул жерде миллиодогон адамдардын өмүрлөрү тууралуу сөз болуп турат”,- деп билдирди.
Донбасстагы абал
Март айынын соңунан тарта Украинанын түштүк-чыгышында абал курчуп, тараптар ок чыгарууларды күчөтүп, аскердик техникаларын чектеш аймактарга тыгыз жайгаштырышууда. Ушуга байланыштуу, Киев тарап аймактагы аскердик куралдардын топтолушуна Москваны күнөөлөп жатат.
Орусия буга чейин Украинанын ичиндеги кагылышууларга жана Минск келишимине эч кандай тиешеси жок экендигин билдирген. Бирок, Владимир Путин кандай гана жагдай болбосун, Орусия Донбасстын элине кайдыгер эмес деген билдирүү тараткан.
Путиндин пресс-катчысы Дмитрий Песков, Донбасстагы абалды кооптуу деп баалап, Украинынын аскерлери түрдүү провокацияларды тымызын жүргүзүп жатышат деп билдирген. Анын айтымында, Орусия конфликттерге аралашпайт жана Донбасста тынчтыктын орношуна кызыкдар.
