Жаштар арасында унутулуп калган рак түрү көбөйүп жатат. Бул тууралуу дүйнөлүк медициналык изилдөөлөрдүн маалыматына таянып, TRT Haber агенттиги кабарлады.
Аппендикс рагы мурда сейрек кездешкен оорулардын бири болгон. Бирок акыркы жылдары бул диагноз жаш курактагылар арасында олуттуу түрдө өсүп жатканы байкалууда. Алсак, 1970-жылдардан кийин туулган муундар арасында аппендикс рагына чалдыккандар көп.
Бул оору дароо билинбейт. Баштапкы белгилери аппендицитке окшош болушу мүмкүн. Мисалы, ичтин оорушу, шишик, көңүл айлануу ж.б. Диагноз көп учурда операциядан кийин гана коюлат. Анткени шишик ички организмге тарап кеткенден кийин гана байкалат.
Бул рак түрүнүн көбөйүшүнө эмне себеп болгону азырынча так аныктала элек. Дарыгерлер муну жашоо образы, туура эмес тамактануу сыяктуу факторлор таасир этиши мүмкүн деп болжолдошууда.
Айрым эксперттер муну «унутулган рак» деп атап, коомчулукту жана дарыгерлерди бул диагнозго маани берип, дыкат көңүл бурууга чакырышууда.
