Дыйкандарга картошка сатууда жеңилдик болушу мүмкүн

Президент Садыр Жапаров Өзбекстанга картошка экспорттоодо кошумча нарк салыгын (КНС) алып салуу маселесин кайра кароону тапшырды.

Маселени Талас облусунун фермерлер бирикмесинин төрагасы президенттин Айтматов жана Манас райондорунун тургундары менен жолугушуусунда көтөрдү.

Фермердин айтымында, быйыл кыргызстандык дыйкандар картошка менен төө буурчакты Өзбекстанга экспорттоодо кыйынчылыктарга туш болушкан. Ал 2022-жылы Садыр Жапаров менен Өзбекстандын президенти Шавкат Мирзиёевдин сүйлөшүүлөрүнөн кийин жети облус үчүн жети өткөрүү пункту ачылып, экспортто КНС алынбай калганын эске салды.

Бирок быйыл салык кайра киргизилген. Фермердин айтымында, анын айынан картошканын сатуу баасы төмөндөгөн.

Айыл чарба министри КНСтен бошотуу бир жолку чечим болгонун түшүндүрдү.

Буга жооп кылып, Жапаров салыкты кайра алып салуу маселесин талкуулоону сунуштады. Президенттин пикиринде, картошка экспортунан КНС алуу бюджетке олуттуу киреше алып келбейт.