Москванын Машков көчөсүндө мушташкан кыргызстандык жана өзбекстандык мигранттарга карата «Майда ээнбаштык» беренеси менен кылмыш иши козголду. Полиция жалпы 11 адамды кармаганы маалым болду. Алардын жетөө кыргызстандык, төртөө өзбекстандык жарандар.
Россиянын маалымат булактарынын билдирүүсү боюнча, көчө тазалап иштеген кыргызстандык мигранттар жердеги карды күрөп бүтүп калган учурда өзбекстандык мигранттар имараттын чатырындагы карды ылдый түшүрүп жиберишкен. Ушундан улам мушташ орун алган. Учурда прокуратура иликтөө иштерин жүргүзүүдө.