Эксперт Макмалда ири темир жол жана контейнердик станция курууну сунуштады
Макмал аймагында ири темир жол станциясын, контейнердик инфраструктураны жана жүктөрдү транспорттун бир түрүнөн экинчисине өткөрүүгө ылайыкталган түйүн куруу зарыл. Бул тууралуу транспорт боюнча эксперт Талант Садакбаев «Биринчи радионун» эфиринде билдирди.
Анын айтымында, Балыкчы — Кочкор — Кара-Кече — Макмал темир жол багытын өнүктүрүү рельстерди төшөө менен гана чектелбестен, жүктөрдү кабыл алуу, сактоо жана ташууну уюштуруучу инфраструктураны да талап кылат.
Эксперт белгилегендей, Макмал аймагында техникалык параметрлери ар башка темир жол линиялары кесилишиши мүмкүн. Ошондуктан бул жерде ири транспорттук түйүн түзүү зарыл.
Садакбаевдин пикиринде, долбоорлоо учурунда контейнерлерди сактоочу жайларды, жүктөрдү бир транспорттон экинчисине өткөрүүчү аянтчаларды жана автоунаа менен темир жолдун өз ара байланышын алдын ала караштыруу керек.
Мындай инфраструктура темир жол аркылуу ички жүк ташууну өнүктүрүүгө гана эмес, Кыргызстанды эл аралык транспорттук коридорлорго интеграциялоого да шарт түзөт.
