“Ош-Тазалык” ишканасына жаңы техникалар тапшырылды
Бүгүн Ош шаарынын мэри Жанарбек Акаев “Ош-Тазалык” муниципалдык ишканасына жаңы атайын техникаларды жана жабдууларды тапшырды.
Иш-чарага Европа Биримдигинин Кыргыз Республикасындагы өкүлчүлүгүнүн Кызматташтык бөлүмүнүн башчысы Йоханнес Баур катышты.
Жаңы техникалар Европалык реконструкциялоо жана өнүктүрүү банкынын (ЕРӨБ) жана Европа Биримдигинин колдоосу менен гранттык негизде алынган. Алардын катарында 1 экскаватор-жүктөгүч, 3 таштанды ташуучу унаа, 6 контейнер жана таштанды ныктай турган атайын техника бар.
Иш-чаранын алкагында Жанарбек Акаев менен Йоханнес Баур катуу тиричилик калдыктарын башкаруу системасын жакшыртуу долбоорунун жүрүшүн жана мындан аркы кызматташтыкты талкуулашты.
Белгилей кетсек, аталган долбоор 2016-жылдан бери ишке ашырылып, анын алкагында ишкананын базасы модернизацияланып, шаарда 300 контейнердик аянтча уюштурулган. Учурда жаңы санитардык полигонду куруу иштери уланууда.