Тарыхый жеңиш: Кыргызстан көкпардан чемпион болду

Чолпон-Ата шаарындагы Көк бөрү аренасында VI Дүйнөлүк көчмөндөр оюндарынын алкагында көк бөрү боюнча Кыргызстан менен Казакстандын курамаларынын финалдык беттеши өттү.

Жыйынтыгында Кыргызстандын командасы Казакстанды 7:2 эсебинде жеңип, Дүйнөлүк көчмөндөр оюндарында көк бөрү боюнча чемпион аталды.

Кыргызстандын курамасынан салымдарды Дастан Русланов — үч жолу, Манас Ниязов — эки жолу, Өмүрбек Эсен уулу жана Исхак Бекболот уулу бирден киргизишти.

Финал курч мүнөздө өтүп, эки команданын улакчылары ат үстүндө чеберчилигин көрсөтүштү. Беттешти трибуналарды толтурган күйөрмандар кызуу колдоп турушту.