Тоолуу аймактарда кар жаап, күн сууктайт

Кыргызстанда 12-13-ноябрда аба ырайы туруксуз болуп, айрым аймактарда катуу жаан жаайт. Тоолуу райондордо кар түшүп, туман капташы күтүлөт.

Кыргызгидрометтин маалыматына караганда, батыштан соккон шамалдын ылдамдыгы секундасына 15-20 метрге чейин жетет.

Чүй, Талас, Ысык-Көл жана Нарын облустарында түнкүсүн абанын температурасы -9 градуска чейин төмөндөйт. Суусамыр өрөөнүндө жана бийик тоолуу аймактарда -15 градуска чейин суук болот. Ал эми Ош, Жалал-Абад жана Баткен облустарынын өрөөндөрүндө түнкүсүн 1…6 градус жылуу сакталат.

Мындан улам тоолуу жолдордо муз тоңуп, тайгактык жаралышы мүмкүн. Катуу жаан-чачын жана туман айдоочулардын көрүү аралыгын чектейт.

Аба ырайынын өзгөрүшү жол кыймылына, энергетика жана коммуналдык кызматтардын ишине тоскоолдук жаратышы ыктымал.