Жээнбек Кулубаев Грузиянын премьер-министри менен кызматташтыкты талкуулады
Кыргызстандын тышкы иштер министри Жээнбек Кулубаев 22-октябрда «Борбордук Азия – Грузия» форматындагы тышкы иштер министрлеринин биринчи жолугушуусуна катышуу үчүн Грузиянын Батуми шаарына барды.
Сапардын алкагында министр Грузиянын премьер-министри Ираклий Кобахидзенин атынан уюштурулган расмий кечки тамакка катышты.
Иш-чарада тараптар саясий диалогду чыңдоо, соода-экономикалык байланыштарды өнүктүрүү, транспорттук-логистикалык жана энергетикалык кызматташтыкты кеңейтүү маселелерине токтолушту.
Жээнбек Кулубаев Кыргызстандын президенти Садыр Жапаровдун жылуу саламын жеткирип, Борбордук Азия өлкөлөрү менен Грузиянын ортосундагы кызматташтыкты тереңдетүүнүн маанилүүлүгүн белгиледи.
Катышуучулар эки тараптуу жана көп тараптуу форматтарда өз ара аракеттенүүнү улантууга даяр экендиктерин билдиришти.
