Кызыл-Кыяда курулуш компаниясына 200 миң сом айып салынды
Баткен облусунун Кызыл-Кыя шаарында алты кабаттуу турак үйдүн курулушун текшерүү учурунда мыйзам бузуу аныкталды. Бул тууралуу Курулуш министрлигине караштуу Мамлекеттик архитектура-курулуш контролдоо департаменти билдирди.
Маалыматка ылайык, Нигматулин көчөсүндө жайгашкан объектте курулуш иштеринин этаптарын кабыл алуу белгиленген тартипте жана мөөнөтүндө таризделген эмес.
Аталган мыйзам бузуу үчүн курулуш иштерин жүргүзүп жаткан «Кызыл-Кыя Курулуш» ЖЧКсына 200 миң сом айып пул салынып, кемчиликтерди жоюу боюнча милдеттүү көрсөтмө берилди.