Өкмөт күйүүчү майдын баасын кармоо үчүн салыктык жеңилдиктерди киргизет

Министрлер Кабинетинин Төрагасы Адылбек Касымалиев өкмөт күйүүчү майдын баасынын кескин өсүшүнө жол бербөө үчүн салыктык жеңилдиктерди киргизерин билдирди. Бул тууралуу ал 13-майда журналисттерге маалымат берип жатып айтты.

Анын айтымында, дүйнөлүк биржаларда дизелдик отундун баасы эки эсеге чейин, ал эми бензин 60-70 пайызга кымбаттаган. Өкмөт Кыргызстандагы бааны турукташтыруу үчүн тиешелүү чараларды көрүп жатат.

Касымалиев күйүүчү майдын кымбатташы жер семирткичтерге жана азык-түлүккө дагы таасир этерин белгиледи.

“Коңшу өлкөлөрдө баа кыйла өсүп кетти. Биз азырынча кармап турабыз. Бирок дүйнөлүк кырдаалга байланыштуу баалар баары бир өсөт”, — деди ал.

Ошондой эле Министрлер Кабинетинин Төрагасы күйүүчү майды ташуу жана сатуудагы айрым салыктар боюнча жеңилдиктер каралып жатканын, тиешелүү токтомдор жакын арада жарыяланарын кошумчалады.