Улан Ниязбеков Кырчын жайлоосундагы милициянын иштерин текшерди
Ысык-Көл облусунда VI Дүйнөлүк көчмөндөр оюндары уланууда.
Кыргыз Республикасынын Ички иштер министри, милициянын генерал-полковниги Улан Ниязбеков орун басарлары менен биргеликте коомдук тартипти жана коопсуздукту камсыз кылуу боюнча кызмат өтөп жаткан милиция кызматкерлеринин ишин текшерүү үчүн Кырчын жайлоосуна барды.
Жеринде министр ыкчам кырдаал менен, өздүк курамдын ишин уюштуруу жана коюлган милдеттердин аткарылышы менен таанышты. Өзгөчө көңүл коопсуздук чараларын сактоого, коомдук тартипти камсыз кылууга жана кызматкерлердин иш-аракеттеринин так жана биргелешкен уюштурулушуна бурулду.
Улан Ниязбеков ошондой эле «Көчмөндөр ааламы» этношаарчагына барып, ал жерде тартылган кызматтардын ишин уюштуруу менен таанышты. VI Дүйнөлүк көчмөндөр оюндарынын алкагында курулган этношаарча Кыргызстандын бардык аймактарынын маданиятын жана салт-санаасын чагылдырат.
Милиция кызматкерлери Дүйнөлүк көчмөндөр оюндарына катышуучулардын жана коноктордун коопсуздугун камсыз кылуу максатында күчөтүлгөн тартипте кызмат өтөөнү улантууда.
