100 жаштагы Кимия энеге өзгөчө сый-урмат көрсөтүлдү

1-октябрь – Карылардын эл аралык күнүндө Ош облусунун башчысы Аманкан Кенжебаев Араван районунун Чек-Абад айыл аймагында жашаган 100 жаштагы Орозова Кимия энеден кабар алды.

Облус жетекчиси 1926-жылы туулган Кимия энени айтылуу майрамы менен куттуктап, бекем ден соолук жана узак өмүр каалады.

Кимия эне өмүрүн үй-бүлөсүнө арнап, эки уулун тарбиялап өстүргөн. Балдарына татыктуу билим берип, алардын бири дарыгер, экинчиси мугалим болуп, бүгүнкү күндө элге кызмат кылып келишет.

Кадырлуу эне учурда 6 неберенин жана 27 чөбөрөнүн сүйүктүү чоң энеси. Ал урпактарынын курчоосунда, үй-бүлөсүнүн сый-урматын көрүп, бактылуу өмүр сүрүп келет.

Жолугушууда Аманкан Кенжебаев Кимия энеге балдарынын, неберелеринин жана чөбөрөлөрүнүн урмат-сыйын көрүп, үй-бүлөсүнүн төрүндө аман-эсен отуруусун тиледи.

Бүгүнкү күндө Ош облусунда 124 миң 757 улгайган жаран жашайт. Алардын 43ү 100 жаштан ашкан узак өмүрлүүлөр.

Улуу муун – элдин тарыхын, нарк-насилин жана турмуштук тажрыйбасын кийинки муундарга жеткирген баалуу мурас. Аларга кам көрүп, урмат көрсөтүү – коомдун маанилүү милдеттеринин бири.