12 жаштагы артисттин чоң сахнага карай жолу

Ат үстүндө түрдүү татаал ыкмаларды аткарып, көрүүчүлөрдү таң калтырган 12 жаштагы Нурел Рысбеков — кыргыз циркинин жаш артисттеринин бири. Ал джигитовка өнөрүн өздөштүрүп, күн сайын машыгып, чоң сахнага даярданып келет.
Ат үстүндө түрдүү ыкмаларды аткарып, көрүүчүнүн көңүлүн бир заматта бура алган бул өнөр сыртынан жеңил көрүнгөнү менен, анын артында күн сайын кайталанган машыгуу жана чоң эмгек турат. Ал эми бул өнөрдү өздөштүрүүдө жаш артист үчүн эң негизги адамдардын бири — анын устаты.

Джигитовкада артисттин чеберчилиги менен катар ат менен болгон ишеним да өзгөчө мааниге ээ. Анткени ат үстүндөгү ар бир кыймыл тактыкты жана коопсуздукту талап кылат. Айрыкча жаш артисттер менен иштегенде бул жагына өзгөчө көңүл бурулат. Ошондуктан машыгуу жана сахнадагы чыгыш учурунда коопсуздук кандай камсыздалат деген суроо жаралат.
Бирок джигитовка — бул бир гана коопсуздук чаралары менен чектелген өнөр эмес. Ат үстүндө бир нече артисттин бир убакта аракет кылышы өз ара ишенимди жана мыкты командалык ишти талап кылат.

Нурел сыяктуу жаш артист үчүн сахнада өзүн ишенимдүү сезүүдө жанындагы өнөктөштөрүнүн да ролу чоң. Ар бир кыймыл алдын ала даярдалып, бири-биринин аракетин так түшүнүү менен аткарылат. Ушундай эмгектин жыйынтыгында гана машыгуу сахнадагы таасирдүү көрүнүшкө айланат.

Он эки жаштагы Нурел Рысбеков үчүн цирк — балалыктын кызыктуу дүйнөсү гана эмес, чоң эмгекти талап кылган өнөр мектеби. Ат үстүндөгү ар бир жаңы ыкма — тажрыйба, ар бир чыгыш — өзүнө болгон дагы бир кадам. Ал эми кичинекей артисттин бул сапары алдыда дагы көптөгөн жаңы номерлер менен уланчудай.