4,9 млн сомдук мыйзамсыз киреше: Бишкекте жубайлар психотроптук зат менен кармалды
Кыргызстан менен Орусиянын тиешелүү кызматтары биргелешип жүргүзгөн атайын операциянын жүрүшүндө Бишкекте 1995-жылы туулган жаран жана анын жубайы кармалды. Бул тууралуу ИИМ билдирди.
Маалыматка караганда, шектүү почта аркылуу алган аба муздаткычтын конструкциялык көңдөйүнө жашырылган 1 килограмм 126 грамм «Alpha-PVP» психотроптук заты менен кармалган.
Үйүн тинтүү учурунда баңгизатты өлчөп, таңгактоого арналган электрондук тараза, зип-пакеттер жана изолента табылган.
ИИМдин алдын ала маалыматы боюнча, зат сатылган учурда мыйзамсыз киреше 4 млн 900 миң сомдон ашмак. Ошондой эле операциянын натыйжасында психотроптук заттын 6 миң 800дөн ашык бир жолку дозасынын таралышына бөгөт коюлган.
Учурда кылмыштуу каналдын башка катышуучуларын аныктоо боюнча тергөө иштери уланууда.
