Бишкекте №83 мектептин 1200 окуучуга ылайыкталган жаңы корпусу ачылды

Бишкекте дагы бир билим берүү мекемеси жаңы корпус менен толукталды. Бүгүн, 6-октябрда, Кыргыз Республикасынын Министрлер Кабинетинин Төрагасы – Кыргыз Республикасынын Президентинин Администрациясынын Жетекчиси Адылбек Касымалиевдин катышуусунда өлкө боюнча 20 социалдык объекттин ачылыш аземи онлайн форматта өттү.

Анын алкагында борбор калаадагы Патрис Лумумба көчөсү, 54/7 дарегинде жайгашкан №83 жалпы билим берүүчү мектебинин жаңы кошумча корпусу пайдаланууга берилди.

Ачылыш аземине Бишкек шаарынын мэри Айбек Джунушалиев, Кыргыз Республикасынын агартуу министри Догдуркүл Кендирбаева жана Кыргыз Республикасынын курулуш, архитектура жана турак жай-коммуналдык чарба министри Нурдан Орунтаев катышты.

Жаңы эки кабаттуу корпус «Ырыс Малик» ЖЧКсы тарабынан курулган. Имарат 1200 окуучуга ылайыкталып, заманбап шарттар менен жабдылган.

Мектептин жаңы корпусунда:

• 40 окуу кабинети;

• 2 компьютердик класс;

• спорттук жана бий залдары;

• китепкана;

• ашкана;

• актовый зал;

• медициналык пункт жана башка зарыл бөлмөлөр жайгашкан.

Белгилей кетсек, бүгүнкү иш-чаранын алкагында Бишкек шаарында жалпысынан 10 билим берүү мекемеси пайдаланууга берилди.

Алар:

• «Ак-Ордо» конушундагы №125 мектеп;

• «Красный Строитель» конушундагы №32 мектептин кошумча корпусу;

• «Киркомстром» конушундагы №42 мектептин кошумча корпусу;

• «Кашка-Баш» конушундагы №124 мектеп;

• «Арча-Бешик» конушундагы №79 мектептин кошумча корпусу;

• №83 мектептин кошумча корпусу;

• «Калыс-Ордо» конушундагы №86 мектептин кошумча корпусу;

• «Өскөн-Ордо» конушундагы №120 мектеп;

• «Көк-Жар» конушундагы №122 мектеп;

• «Дордой» конушундагы №94 мектептин кошумча корпусу.

Жаңы мектептердин жана кошумча корпустардын ачылышы борбор калаадагы окуучулар үчүн билим алууга ыңгайлуу шарттарды кеңейтүүгө багытталган.