Кыргызстан менен Россиянын агрардык ЖОЖдору кызматташтыкты кеңейтет
Жыйынга Кыргызстандын жана Россиянын агрардык жогорку окуу жайларынын жетекчилери жана өкүлдөрү, окумуштуулар, мамлекеттик органдардын жана тармактык уюмдардын өкүлдөрү катышууда.
Иш-чарада консорциумдун 2025–2026-жылдардагы ишинин жыйынтыктары чыгарылып, 2027–2028-жылдарга карата иш планы талкууланууда.
К.И. Скрябин атындагы Кыргыз улуттук агрардык университетинин ректору Нурзат Тотубаева консорциум 2024-жылы түзүлгөндөн бери агрардык билим берүү жана илим тармагындагы кызматташтыкты өнүктүрүү үчүн маанилүү аянтчага айланганын белгиледи.
Анын айтымында, учурда консорциумдун курамы кеңейип, ага Алтай мамлекеттик агрардык университети да кошулду. Бул эки өлкөнүн агрардык ЖОЖдорунун ортосундагы байланыштарды мындан ары чыңдоого шарт түзөт.
Жолугушууда агрардык билим берүүнү өнүктүрүү, илим менен өндүрүштүн байланышын күчөтүү, санариптик технологияларды киргизүү, академиялык мобилдүүлүктү кеңейтүү жана эмгек рыногуна талап кылынган адистерди даярдоо маселелери каралууда.
Ошондой эле геномдук селекция, топурактын биоинженериясы жана так дыйканчылык сыяктуу заманбап багыттар боюнча кызматташуу мүмкүнчүлүктөрү талкууланууда.
Университеттин маалыматына караганда, учурда окуу жайда 13 млн сомдон ашык каражатка төрт ири мамлекеттик бюджеттик илимий тема ишке ашырылууда. Мындан тышкары, 2027-жылга карата конкурстук тандоого 15 долбоор сунушталып, студенттердин үч стартап-долбоору гранттык колдоого ээ болгон.
Жыйындын алкагында тараптар кызматташтыкты өнүктүрүүгө багытталган бир катар документтерге да кол коюшту.
