Бишкекте Португалия – Өзбекстан беттешин көрүү үчүн күйөрмандар аянтчасы уюштурулду
2026-жылдын 23-июнунда Бишкек шаарындагы Т. Усубалиев атындагы аянтта 2026-жылдагы Дүйнө чемпионатынын финалдык этабынын экинчи турунун алкагында өткөн Португалия менен Өзбекстандын курама командаларынын беттешин түз эфирде көрсөтүү үчүн атайын күйөрмандар аянтчасы уюштурулду.
Иш-чаранын алкагында борбор калаанын тургундары жана коноктору үчүн чоң экран орнотулуп, футбол күйөрмандары оюнду бирге көрүү мүмкүнчүлүгүнө ээ болушту. Аянтка жүздөгөн күйөрмандар чогулуп, өз командаларына колдоо көрсөтүп, дүйнөлүк футбол майрамынын атмосферасын чогуу сезишти.
Көрүүчүлөр үчүн интерактивдүү оюндар, викториналар жана баалуу белектер ойнотулган сынактар өткөрүлүп, иш-чара майрамдык маанайда өттү. Уюштуруучулар ар кандай курактагы катышуучулар үчүн кызыктуу көңүл ачуу программаларын даярдашкан.
Беттеш учурунда аянтта өзгөчө шаңдуу атмосфера өкүм сүрдү. Күйөрмандар оюндагы курч жана чечүүчү учурларды кызуу кол чабуулар жана колдоолор менен коштоп, борбор калаанын чок ортосунда чыныгы футбол майрамын жаратышты.
