Бишкекте түрк дүйнөсүнүн жалпы келечеги талкууланды
Бишкекте «Түрк дүйнөсү диалогдору: Жалпы келечек, жалпы көз караш» аттуу панелдик талкуу өттү. Иш-чара Түркиянын Президенттик Администрациясынын Коммуникациялар башкармалыгы тарабынан уюштурулду.
Талкуу 29–30-октябрда Түркияда өтө турган Түрк мамлекеттер уюмунун мамлекет башчыларынын 13-саммитинин алдында уюштурулуп жаткан панелдер сериясынын төртүнчү жыйыны болду. Буга чейин мындай талкуулар Астана, Баку жана Ташкент шаарларында өткөн.
Иш-чарада түрк мамлекеттеринин ортосундагы саясий, экономикалык, маданий жана билим берүү тармагындагы кызматташтыкты кеңейтүү, коопсуздук, транспорттук байланыштар, жалпы алфавит, медиа жана жасалма интеллект маселелери талкууланды.
Түркиянын Президенттик Администрациясынын Коммуникациялар башкармалыгынын башчысы Бурханеттин Дуран видео кайрылуусунда түрк мамлекеттеринин геосаясий атаандаштык, энергетикалык жана азык-түлүк коопсуздугу, киберкоркунучтар жана дезинформация сыяктуу чакырыктарга биргелешип жооп кайтаруусу маанилүү экенин белгиледи.
Панелде Кыргызстандын мурдагы президенти Роза Отунбаева, Жогорку Кеңештин биринчи төрагасы Медеткан Шеримкулов, Түркиянын парламентинин депутаттары Ильяс Топсакал жана Селман Огузхан Эсер, Стамбул Айдын университетинин ректорунун орун басары Рагып Кутай Каража жана башка эксперттер сөз сүйлөштү.
Роза Отунбаева түрк мамлекеттеринин ортосундагы мурдагы жалпы идеялар бүгүнкү күндө конкреттүү кызматташтыкка айланып бара жатканын белгиледи. Ал Кыргызстандын дипломатия, билим берүү жана медиа тармактарында Түркиянын тажрыйбасын колдонуп жатканын айтты.
Ал эми Рагып Кутай Каража экономикалык интеграциянын жана Орто коридордун стратегиялык маанисине токтолуп, Бишкекте Түрк дүйнөсүнүн логистика жана байланыштуулук институтун түзүүнү сунуштады.
Медеткан Шеримкулов түрк мамлекеттеринин кызматташтыгында коопсуздук маселеси өзгөчө маанилүү экенин белгиледи.
Иш-чаранын соңунда катышуучулар журналисттердин суроолоруна жооп берип, ТМУнун ролу, жалпы алфавит, жаштардын потенциалы жана түрк дүйнөсүнүн эл аралык аренадагы орду боюнча пикирлерин билдиришти.
Талкууга парламент депутаттары, дипломаттар, мамлекеттик мекемелердин өкүлдөрү, окумуштуулар, эксперттер жана эл аралык медианын өкүлдөрү катышты.
