Бишкекте улгайган жарандарды алдап, банк карталарын алмаштырган шектүү кармалды

Бишкек шаарында улгайган жарандарды алдоо жолу менен акча каражаттарын алып жүргөн жаран кармалды. Бул тууралуу Кыргыз Республикасынын Ички иштер министрлигинин басма сөз кызматы билдирди.

Маалыматка ылайык, 1954-жылы туулган О.Ж. аттуу жаран милицияга кайрылып, белгисиз адам Жаш Гвардия проспектисиндеги банкоматтардын биринде ага акча чыгарууга жардам берүүнү сунуштап, банк картасын алдын ала даярдалган башка картага алмаштырып кеткенин билдирген.

Шектүү кийинчерээк башка банкомат аркылуу жабырлануучунун эсебинен акча чыгарып, ага 13 миң сом өлчөмүндө материалдык чыгым келтирген.

Бул факты боюнча Кыргыз Республикасынын Кылмыш-жаза кодексинин 209-беренеси (Алдамчылык) менен кылмыш иши козголгон.

Ыкчам-тергөө иштеринин жүрүшүндө ИИМдин Кылмыш иликтөө башкы башкармалыгынын кызматкерлери тарабынан 2004-жылы туулган А.И. аттуу жаран аныкталып, кармалган.

Тергөө учурунда кармалган жарандын Бишкек шаарында ушул сыяктуу дагы бир нече алдамчылык фактыларына тиешеси бар экени аныкталган. Анын башка эки факты боюнча жабырлануучуларга 30 миң жана 20 миң сом өлчөмүндө чыгым келтиргени белгилүү болгон.

ИИМдин маалыматына караганда, шектүү негизинен улгайган жарандарды тандап, банкомат колдонууда жардам көрсөтүүнү сунуштаган. Ал алардын ишениминен пайдаланып, банк карталарын байкатпай алмаштырып, кийин эсептериндеги акча каражаттарын чыгарып турган.

Ички иштер министрлиги жарандарды сак болууга, банк карталарын чоочун адамдарга бербөөгө жана PIN-код, сыр сөз сыяктуу купуя маалыматтарды эч кимге айтпоого чакырат.

Эгерде жарандар бул адамдын аракеттеринен жабыркаган болсо же кошумча маалыматка ээ болсо, 0 (701) 001-708 жана 0 (508) 088-988 номерлерине кайрылса болот.