Бишкекте «Урааным Манас» долбоору өттү

2026-жылдын 30-октябрында Бишкектеги Ала-Тоо аянтында жаштарды мекенчилдикке тарбиялоого жана улуттук баалуулуктарды даңазалоого багытталган «Урааным Манас» долбоору өткөрүлдү.

Иш-чарага Маданият, маалымат жана жаштар саясаты министринин орун басары Айбек Дайырбеков, ошондой эле К. Үсөнбеков атындагы Аскер институтунун курсанттары катышты.

Долбоордун алкагында Кыргыз улуттук «Манас» театрынын өнөрпоздору концерттик программа тартуулашты. Төкмө акындар Акматбек Султан уулу, Нурайым Бактияр кызы, дастанчылар Иманбек Жээнбеков, Гулина Калыгулова жана театрдын манасчылары Манас эпосунан үзүндүлөрдү, төкмө ырларды жана дастандарды аткарышты.

Иш-чаранын негизги максаты — улуу «Манас» эпосу аркылуу жаш муундун мекенчилдик сезимин ойготуу, улуттук аң-сезимди бекемдөө жана ата-бабалардан калган руханий мурасты жайылтуу.

Иш-чаранын соңунда «Урааным Манас» долбоорунун эстафетасы И. Ахунбаев атындагы Кыргыз мамлекеттик медициналык академиясына тапшырылды.